بالصور : انتحار محصول الذرة الموسم الجارى امام حشرة الحشد الجياشة

كتب : طلعت الطرابيشى

مزارعى الذرة : موسم 2023 للنسيان بسبب " دودة الحشد الجياشة

اتهام الفلاحين باثارة البلبلة وافتعال المشاكل ... وتكرار تصريحات تحت السيطرة 

أمسك أعصابك .. وخد نفس عميق .. وإهدى خالص على قد ماتقدر .. ومع شاى فى الخمسينه تعالى نحكى لك مشكلة " الدوده " مع الدره .  

مزارع الدره السنه دى من غير زعل فى خبر كان .. بعفيه شويه . يعنى موسم  للنسيان .. وتقدر تقول بقلب ميت  مش جايب همه . وها يتسبب فى خساير كبيره للمزارعين . بسبب لعنة الأفه اللى ماتتسمى " دودة الحشد الجياشه " ,  اللى واخده فى وشها , وطايحه تلطيش فى أراضى الدره شمال ويمين . مش مخليه أى عود  أخضر سليم  .

الحكاية ومافيها , إن " الدودة " اللى ماتتسمى , واللى بيوصفوها الخبرا  " بحرشفية الأجنحة " من جوعها وشراستها نازلة  أكل وحش فى مزارع الدره " بالسم الهارى " . وكمان ناقصه تاكلنا . أفه " أعوذو بالله " مؤذيه مابترحمش . ومن جبروتها مفيش نوع مبيد مأثر فيها . لا مبيدات كيماويه نافعه معاها , ولا عضوية  , ولا حتى المبيدات الحيويه قدره تصد معاها  .. " إلهى يقصف عمرها البعيده " .

ولمحاسن الصدف , الحكومة من طبيتها السنه دى . حبت تبحبحها على الفلاحين  . " قوم أيييييه " زودت مساحات أراضى الدره عن السنه اللى فاتت  . زودتها لأكتر من  3 مليون و400 ألف فدان .  قال إيييييه تضرب 4 عصافير بحجر واحد . تفرح الفلاحين , وتزود الإنتاج  , وبالمره تقلل فاتورة الإستيراد , وتحل مشكلة العلف لمزارع الفراخ . علشان الأسعار تقل , والناس تاكل وتنبسط . لكن الفرحه ماتمت .  المحصول " بالهنا والشفا " كلته الدوده  !! " حار ونار فى جتتها البعيده "

 وبعد ما زادت " الدوده " من كوارثها , وسمعت فى كل المزارع . وماجبتش  معاها كل وسايل المكافحه . ملقوش الفلاحين قدامهم غير دق التليفونات , ومناشدة  المسئولين فى مديريات الزراعه , والوزاره برسايل " الواتس أب ". علشان يشوفوا لهم صرفه مع " الدوده  " . يمكن يلاقوا على إيديهم الحل . لكن راحت جهود المسئولين على مفيش .

الغريب ان المزارعين ابتكرو طرق عديدة عشان المكافحة ومفيش فايدة مزارع اسمه عبد الحميد محمد مصباح من مركز الشهداء فى المنوفية قال ان الدودة اعوذ بالله اكلت كل الدرة فى الغيط حتى مفكرتش تسبلنا شوية درة للولاد , ومعظم الناس حولو الدرة لسيلاج قبل الدمار الشامل ال سببته الحشرة فى المحصول وحرمتنا منه بالكامل مع اننا استخدمنا كل حاجة قالولنا عليها بتوع المبيدات ..... مزارع تانى من ميت غمر دقهلية أكد لنا ان الحشرة كانت صعبة السنة الـ فاتت 2022 بس السنة دى كانت متوحشة واكلت كل اخضر فى الارض وسببت خساير كبيرة للمزارعيين ... وحالات كتيرة شبيها فى بنى سويف , والفيوم , والبحيرة وباقى المحافظات بعد ان اصبحت حشرة خارج السيطرة .

كالعاده الدودة تحت السيطره

واللى " زاد الطين بله " وحز فى نفسية الفلاحين ,  تشكيك مسئولين الزراعه فى شكاوى الفلاحين . وإتهامهم بتهويل مشاكل الدوده . حتى لما إتحركت لجان المكافحه فى الوزاره , ومديريات الزراعه بضغط من الوزاره . ومرورها على المزارع , والغيطان , ومقابلة الفلاحين . لسه بيقولوا الدوده تحت السيطره . وإن الفلاحين شغالين إشاعات , وإفتعال المشاكل مع الوزاره .

وبغضب ينفى الحاج " جعفرى " عمدة فلاحين الصعيد , إتهام الفلاحين بقلة الحيله , وإشاعة البلبله . وبمراره يسأل " الحاج جعفرى " لمصلحة مين التشكيك فى كلام الفلاحين , وتحميلهم كوارث الدوده ؟  وهم فين كبارنا فى الزراعه , ومركز البحوث الزراعيه من مواجهة " دودة الحشد السعرانه " . وليه ماحدش قادر يوصف لنا علاج للحشره اللى ماتسويش تلاته مليم , ومغلبانا معاها .

اما الحاج مصطفى عبد الهادى ودا من كبار زراع الدرة فقال , ان الحشرة قضت فى الغيط على 70 % من المحصول , وبهدلت الارض وبيقول ان الحشرة موجودة وعايشة وسطينا  وبقت خطر على زرعنا وخايف انها تدمر باقى محاصيل الخضر وبيستغيث بوزارة الزراعة فى وجود حل او مشروع قومى يقلل من حجم الحشرة السنوات الجاية , وقال لما الحشرة زادت كدا ليه مايبقاش فيه فرمونات تجمع الحشرة وتتكافح عشان نقلل خطورتها ماهى خلاص موجودة بقوة , وبعدين موش بنعرف نرش الدرة كويس قبل الحصاد عشان العيدان طويلة , وقال بنرش كل 3 ايام ومفيش فايدة لان الدرة شد حيلة وبقى صعب نزود الرش عشان القلب ماينشفش طب نعمل ايه

الدودة دخيلة على مصر  

ورغم ان الدودة دخيلة علينا من برة فهى كل يوم بتتفرعن أكتر . علشان مفيش مبيد له تاثير عليها . وحسب كلام العلما , إن الدوده المفعوصه , اللى بنقول عليها ماتسويش تلاته مليم الفراشة بتاعتها بتطير مسافة 100 كيلو كل يوم . ولا الطيارة " النفاسه , أو الفانتوم " . حكايات الدوده والكلام عنها مابينتهيش . خد عندك :

بتهدد صلاحية 80 محصول

·        الدوده اللى ماتتسمى أفه حشريه من عيلة حرشفية الاجنحة " الدودة فى طورها الاخير  , بتاخد فى وشها أى زرع أخضر . وبتتسبب فى كوارث كبيره .

·        " الدره " أكتر محصول بتفضل تعيش عليه عشان هو العائل الاساسى للحشرة  غير 80 محصول تانى . زى  الفاصوليا , الرز , والحبوب , والقطن , وكل محاصيل الخضار .. دا مسبب رعب للفلاحين خايفين ان محصول الفاصوليا تفترسه الدودة الملعونة هو كمان عشان تفضل عايشة امال هى هتسيب نفسها تموت لا طبعا  .

·         لها أكتر من إسم . زى دودة الحشد الخريفيه , دودة الحشد الجياشه , دودة حفار الدره , الدودة الحربيه , ودودة الجيش الأمريكى بلدها الأصليه . وتعيش فى المناطق الحاره .

·        بطير بسرعة كبيره ولمسافة 100 كيلو متر فى الليله الواحده .

·        6 سم طول الحشرة الكاملة , وطول جناحها 7 سم . ولون أجنحتها من قدام بنى فاتح , ورمادى , ولون أجنحتها اللى وراها بيضه , وفضى .

·        بتنتج أنسى الدوده 1000 بيضه . وبيزيد لـ 2000 بيضه .

·        بيقفس البيض من ( يومين – 3 أيام ) .

·        للحشره اللى ماتتسمى ست أطوار . يعنى ( 6 أعمار ) . لأن العمر يعرف بالطور . وطورها الأخير " أعوذ بالله " هو المعدى .

·        بتبتدى فى طورها الأول بيرقه صغيره لونها أخضر , وراس إسود . تعيش على ورق الدره من تحت , وبعد ماتكبر شويه فى طورها التانى بيكون رسها لون البرتقان . وتهاجم ورق الدره من تحت , ومن فوق .

·        فى طورها التالت للخامس بيكون ضهرها لونه بنى , وتشكل على جنبها خطوط بيضه . وفى الطور السادس المؤذى راسها ياخد اللون فنلة الأهلى مع اللون البنى .

·        بتختفى الدوده بالنهار , وترجع تظهر بالليل .

·        إنتشرت خلال السبع سنين الأخيره فى 40 بلد أفريقى . ودخلت مصر فى شهر سته 2018 .

·        مدة حياة الدوده ماتزيدش عن شهر ( 30 يوم ) فى الصيف , و تلات شهور ( 90 يوم ) فى الشتا .  

فى المشمش تعويض الخساره

" غلب حمارنا " . خلاص مفيش أى حل . كل الببان إتسددت . نروح لمين , وندق تليفونات لمين تانى ؟ الدوده إتوحشت , وإتسرعت أكتر , وطايحه فى الزرع . مش مبطله أكل , ونخوره وتخريب .. ياخسارة الحصاد السنه دى .. المحصول قل كتير كتير , وقال إييييييييييه كنا طمعانين نعوض خسارة السنه اللى فاتت .