تضارب التوقعات حول تأثير رفع الدولار الجمركى لمستلزمات الإنتاج

كتب : طلعت الطرابيشى

وزير الماليه : الزيادة 67 قرش فقط فرق توحيد العملة فى السوق المصرفيه

الدولار الجمركى .. من موضوع ثانوى هامشى لحديث الشارع , بعد قرار الحكومه المفاجئ برفعه لـ 19,31 جنيه فى " الويك أند " أجازة نهاية الأسبوع . الناس فى الأسواق قلقانه .. أيديهم على جيوبهم " اللهم أجعله خير " الأسعار هاتزيد تانى , وياترى توقيت الزياده مع دخول المدارس مغزى . هى الجمارك ناويه تعمل مشكله مع المستوردين . ولا نصبه فخ للزراعه , والصناعه من جديد . إيه الحكايه   ؟

ياعم ماتخليش خيالك يروح لبعيد.. لافخ ولادياولو .. تعالى معايا أقول لك قصد الحكومه ! الموضوع ومافيه إن وزير الماليه , حب يقرب المسافات بين سعر الدولار فى البنوك , وسعر الدولار الجمركى اللى بتحاسب بيه  الجمارك , واللى سعره أقل . قوم أيييييييه الوزير وحد سعرهم , علشان مايبقاش فى سعرين للدولار فى السوق .

لكن الموضوع اللى يهمنا ويهم الأسواق . وهو موضوع الخامات , ومستلزمات الإنتاج اللى بنستوردها للزراعه, والصناعة . فيقلق بسبب تضارب رأى رؤساء شعب المستوردين بالغرف التجارية , حولين تأثيره على الأسعار . فى أراء بتحذر من أى الزياده فى معاملات الجمارك . وشايفه إن هايكون له تأثير على أسعار فى السوق , حتى لو محدود بنسبة 10 %  . وأراء تانيه بتنفى وجود أى تأثير على أسعار . ورأيها ماشى مع رأى الحكومه , أن الزياده فى سعر الدولا الجمركى أقل من جنيه واحد . ولاعلاقه له بدخول المدارس . لأنه كان متفق عليه لتوحيد سعر العمله فى السوق .

67 قرش زيادة فى الدولار الجمركى

هاتقول إذا كان أصحاب المصلحه مختلفين نصدق مين ؟

الزياده فعلا ماتمسيلش عبء على المستوردين هى 67 قرش , وعلشان يتساوى سعره مع سعر الدولار الحالى فى البنوك وهو 19,31 جنيه . وال 67 قرش بيمثلوا قيمة الفرق بين سعر الـدولار الجمركى الجديد  بعد الزياده الأخيره يوم 8 سبتمبر 2022 , وبين سعرالدولار الجمركى  القديم وهو ( 18,64 جنيه ) , اللى كانت ببتحاسب بيه الجمارك فى شهر يونيه اللى فات . ومفيش أى تأثير على مستلزمات الزراعه والصناعه اللى كنا بنستوردها . لأن معظمها معفية من الجمارك . وفى قوايم الحكومه كانت أعنلتها من سنتين بـضم 85 سلعه من اللى بنستوردها , بتخص الإنتاج الصناعى والزراعى تعريفتها الجمركيه مابتزيدش عن 2 %   .  وسبق للحكومه نزلت ضريبة القيمة المضافة علي الخامات الأوليه ومدخلات الإنتاج من 14 % , إلى 5 % .

هاتسألنى وليه الأسعار فى السوق شدا حيلها علينا بزياده ؟

لأن باقى السلع اللى بنستوردها مش معفيه , وضرايبها . وجماركها عاليه  . زى العربيات , وقطع غيارها , والسلع الكماليه , وبعض السلع الوسيطة . والسلع دى مش هايفرق معاها زياده 67 قرش – لأنها – كانت بتدفع ضريبة قيمه المضافه 14 % قيل خفضها , وتعريفتها الجمركيه 100 % , وبتوصل فى بعض السلع لـ 200 % .

" العين الحمرا "

اللى يهمنا نعمل حسابنا نستعد لزيادة الأسعار ولا مش هانحس بيها  ؟

الواضح كده من مبلغ الزياده ومن قرار وزير الماليه , الزياده بسيطه . بس المهم التجار والمستوردين مايكونش ليهم رأى تانى . لأن ألاعبهم فى السوق مطمنش . أساتذه فى النكد على الناس . ممكن علشان المكسب يشعللوا السوق – لو – الحكومه ماقمتش بدورها , وبينت لهم العين الحمرا .

واللى عاوز يشترى عربيه فى أمل يستنى  أسعارها تنزل  ؟

إنسى .. بلاها عربيات السنه دى , واللى بعدها . مفيش حاجه سعرها هاينزل . حتى الماركات الأوربيه  , اللى عربيتها معفيه من الجمارك حسب " الجات " إتفاقية الأمم المتحدة لتحرير التجاره , وكمان المغرب اللى بتجمعنا بيها إتفاقية " أغادير " , وبعض الدول العربيه والأفريقيه اللى داخلين فى إتفاقية " الكوميسا " . أسعارها واسعار غيرها من الواردات أسعارها تضاعفت . وكتير من المصانع قفلت , أوقللت إنتاجها . بسبب الأزمه العالميه , ونقص الخامات , ومستلزمات الإنتاج .

كلاكيت تالت مره

توقعاتك دى هاتكون أخر زياده فى الدولار الجمركى ؟

معلوماتى المتواضعه مادام الأزمه لسه مكمله , مفيش حاجه متوقع تنزل . وكل الإحتمالات ممكنه .  والدولار بطبيعته بحالات حسب أحواله فى البنوك . وأقرب مثل  خلال الخمس شهور اللى فاتو زاد سعره 3 مرات . كان فى شهر إبريل السنه دى 2022 سعره 16 جنيه , وفى مايو بعد شهر زاد جنيه . وبعد رفع سعر الدولار فى شهر يونيه تم رفع سعر الدولار الجمركى جنيه و64 قرش . وأخر زياده فى شهر سبتمبر الحالى 2022 . يعنى بعد 3 شهور بس زاد 67 قرش . وطبعا ده مش أخر زياده طالما الأزمه اللى بتواجه العالم مستمره معانا . 

ومن باب العلم نفكركم , بإن حساب الجمارك والضرايب على السلع اللى بنستوردها بتنقسم لـ 3 قوايم سلعية .

واردات صفر جمارك

القايمه السلعيه رقم ( 1 ) , جميع وارداتها معفيه بالكامل ( رسومها الجمركيه صفر ) هى :

·       الأسواق الحره , والمناطق الحره , والمناطق الإقتصاديه ذات الطبيعه الخاصه زى قناة السويس . جميع وارداتها وصادراتها السلعيه والصناعية معفيه .

·       مشترىات , وواردات  السفارات , والقنصليات , والمفوضيات الرسمية ( غير الفخرية أو الشرفيه ) بغرض إستخدمها وإستعمالها . ماعدا المواد الغذائيه والخمور " مشروبات الست روحيه " وكل مايدخل فى باب " المزاج " الدخان .

·       كل السلع الوارده , للإستعمال الشخصى من أمتعه شخصيه , وأثاث , وأدوات منزليه بشرط خضوعه للمعاينه . مع حق فى إصطحاب كل موظف أجنبى من العاملين بالبعثات الدبلوماسية سياره مستعمله واحده .

·       الأمتعه الشخصيه للقادمين من الخارج .

·       العينات اللى بيتم إستهلاكها بغرض التحليل فى المعامل الحكوميه .

·       كل الحاجات والمتعلقات الشخصيه غير التجاريه , زى النياشين , والميداليات , والجوايز الرياضيه والعلميه .

·       الهبات , والتبرعات , والهدايا الممنوحه , والوارده للجهاز الإدارى للدوله , أو وحدات الإداره المحليه .

·       كل ماتستورده المعاهد العلميه ويخص المجال العلمى , والتعليمى , والثقافى  .

 

مدخلات الإنتاج 2% جمارك

القايمه السلعيه رقم ( 2 ) معظمها ضمن السلع المعفية من الجمارك بنسبة تتراوح بين 80 % ’ و98 % , وضرية قيمة مضافه أو رسم وارد 5 % فقط  ( مستورده , أو محليه ) . وتشمل 351 مجموعه سلعيه . منها 77 بند من الخامات الأوليه ومستلزمات الإنتاج الزراعى والغذائى , و58 بند سلعى فى مجال الكيماويات , و12 فى النسيج , و38 فى الأخشاب , و22 فى النقل والمواصلات , و52 فى الألات والمعدات , و65 فى قطاعات تانيه .  ومنها :

·        مدخلات الإنتاج الزراعى , , وصناعةالسيارات الكهربيه , والصناعات التجميعيه اللى بيزيد الإنتاج المحلى فيها أكتر من 40 % .

·       ألات ومعدات جنى , وحصاد المحاصيل الزراعيه من مكابس القش , والعلف , ومعدات تصنيف , وفرز البيض , والفواكه .

·       المنتجات الزراعيه من الحبوب , والبقول , والذره , والصويا , والمستضرات العلفيه , والبذور , والتقاوى , وشتلات الخضر والفاكهه ,والمحاصيل الذيتيه .

·       منتجات المطاحن .

·       الحيوانات والطيور الحيه , والمذبوحه , والطازجه , والمجمده والمبرده . وأغذية القطاع الحيوانى والأسماك .

·       الأدويه والمواد الفعاله اللازمه لصناعات الأدوايه , والأمصال واللقحات البيطريه , والبشريه , ومستلزمات زراعة الأنسجه , والأورام , وأجهزة الغسيل الكلوى .

·       معدات تجهيز محطات تموين سيارات بالكهربا , أو الغاز الطبيعى , والمحطات الشمسيه , و الرياح , وقطع غيارها , ومحطات تحلية الميه .

القايمه السلعيه رقم ( 3 ) معظمها غير معفيه . وتشمل المجموعات السلعيه الكماليه , والرأسماليه ( السلع المنتجه بالكامل خارج البلاد ) من معدات وألات , ووسائل نقل , وأثاث , وملابس جاهزه , وتجهيزات مشروعات المنشآت السياحيه والسكن الفاخر . وتشمل لعب الأطفال , ومعدات الملاهى , والسجاير بجميع أنواعها , والخمور , والمكسرات , الجمبرى , والكفيار , والزينه , وأكل القطط والكلاب .