نشرة أخبار السوق الزراعى الأسبوعية

تعالوا بينا نخطف رجلينا نقعد فى حته ضله ونتعرف على أحوال السوق

·       إيفر جرو مش ناويه تجيبها البر !!

... الخبر الطازه اللى معانا والسوق بينتظره . مجمع " إيفر جرو " الصناعى بمدينة السادات قرر يكوش على السوق الزراعى , وينزل بتقله . هايقدم 4 منتجات أعلاف  ومكملات غذائيه حيوانيه ومخصبات جديده من إنتاجه . من أيام مع بداية شهر أغسطس الحالى 2022   بدأ تشغيل خطوط إنتاج المرحله التالته لمجمع شركاته . حسب وعد رئيس الشركه المهندس محمد الخشن . وكان " الخشن " بدأ التشغيل التجريبى لخطوط إنتاجه الجديد فى شهر مايو الماضى . والمنتجات هى فوسفات الكالسيوم . وده منتج خاص بأعلاف المزارع السمكيه والحيوانيه والسمكيه , وسوبر فوسفات وده طبعا سماد أحادى . ده غير كلوريد الكالسيوم , والفوسفوريك .

·       باى باى مناقصات القمح  

... هيئة السلع التموينية " كومندا " شرا إحتياجات الحكومه من السلع الأساسية  , أعلنت إنسحابها من 5 مناقصة دولية لتوريد القمح  . بسبب إستغلال الحاج " بايضون " رئيس أمريكا بايدن , وأسواق 4 دول تانيه مستغله هى  ( الأرجنتين , والبرازيل , وكندا , وإستراليا ) حاجة المصريين الشديده لشحنات القمح  لزوم طحن الدقيق وإنتاج رغيف العيش . وقوم أيه ضاعفوا الأسعار أكتر ماهى مولعه . لكن على مين مصر قالت والنبى منا شريه قمحهم , وشاورت لهم  باى باى كمبوره .. إلعبوا غيرها . بعد ما كانت ناويه تشرى كميات كبيره من المناقصات المعروضه , واللى كانت هاتبدأ شحنها من يوم 16 أكتوبر الجاى ولمدة شهرين .

المهم إن هيئة السلع لو شربت شاى بايضون اللى باليسمين , ووافقت على الشرا بالأسعار النار دى , كان سعر الدقيق هايولع , ورغيف العيش هايضاعف سعره مرتين تلاته  . وإحنا مش ناقصين .

·       اللى ييجى على المصريين مايكسبشى

... مافتش أسبوع على رفض هيئة السلع  شاى " الحاج بايضون " , وأعلنت الست " جرينسبان " مسئولة " الأونكتاد " منظمة الأمم المتحدة للتجارة والتنمية أمس الخميس إنخفاض أسعار القمح للنص . يعنى سعره نزل بنسبة 50 % . وطبعا البركه فى " مستر بوتين " رئيس روسيا اللى سمح لأوكرانيا بتصدير إنتاجها من القمح . وادى لنزول سعر برميل البترول من 117 دولار , لأقل من 93 دولار . ربنا كريم علينا

·       حنين " كيما " للزمن الجميل

...  شركة كيما2  واللى بتحتل الترتيب الخامس على مستوى العالم فى تصدير سماد اليوريا .  بتفكر بجدية تعود لأمجادها من تانى . كانت كيما فى الستينات بتنتج الأمونيا الخضرا .  والكلام النهارده مبقاش سر بعد تصريحات مسئولي الشركه القابضه للكيماويات  . الشركه بتقوم الايام دى بعمليات تطوير وتحديث شامله لمعاملها , وخطوط إنتاجها لإنتاج الأمونيا الخضرا . علشان تواكب العصر . الأمونيا الخضرا هى ببساطه تفاعل الهيدروجين مع النتروجين عند درجات حراره مرتفعه , وضغط عالى , وبتعتمد على مصادر الطاقه الجديده والمتجدده .

·       إنقاذ كيما2 من التصفيه

... شركة كيما2  كانت هاتسلم نمر فى سنة 2003 . كانوا هايصفوها , وعمالها كان مصيرهم الشارع بسبب خسائرها الكبيره . ولكن لحسن الحظ الدوله بعد مناقشات وخد وهات , وفقت إنها تعومها عن طريق رصد مبالغ كبيره لهيكلتها , وتحديثها . ومع الأيام تحولت من الخساره للربح .  والسنه اللى فاتت حققت من إنتاج وتصدير اليوريا والأمونيا مبيعات بحوالى 4,5 مليار جنيه . ومقرر زيادة المبيعات لـ 6 مليار جنيه .